سلسبيل اصغر مدرب مهارات حياتيه للنشئ المعتمد دوليًا من وزارة الشباب والرياضة و منظمه الامم المتحدة اليونيسيف

سلسبيل اصغر مدرب مهارات حياتيه للنشئ المعتمد دوليًا من وزارة الشباب والرياضة و منظمه الامم المتحدة اليونيسيف

سلسبيل نموذج للبنت المصرية التى احبت الرسم وتحلم بالعالمية

نجحت سلسبيل حسين إمام صاحبة  الـ20 عاما ابنة محافظة الجيزة في إبهار الجميع من خلال موهبتها الفنية بالرسم باستخدام الفرشة والألوان لتفتح أبواب الفن من خلال لوحاتها الفنية المعبرة والتى تتسم بطابع روح وأصالة بلادها  لتناشد العالم بأسلوب جديد يدفع إلى الأمل والتفاؤل.

تقول بدايتي كان شغف وحب للرسم من وأنا فى إبتدائى وانا بحب أقلد كل حاجة أشوفها وديمًا ماما كانت يتجبلي قصص الكرتون الونها لحد ما بدأت أشف الرسمه ومع الوقت  بدأت احاول اقلد الرسمه كانت بتطلع مش احسن حاجه بس مع كل مره برسم رسمه جديده كنت بلاحظ ان رسمتي بتقرب للأصل وكانت ماما بتشجعني وكل مره كانت بتجبلي قصة لشخصيه كرتونيه جديده وكان وقتها عندي ٧ سنين .

كنت بروح لمُدرسين الرسم في مدرستي واقعد اخليهم يعلموني الرسم وكنت ديمًا بشترك في كل مسابقات المدرسة بتاعت الرسم قبل ما أعرف يعني إيه كلمة موهبة أصلا كنت أمسك القلم واقلد أي شيء أشوفه وبكون مبسوطه جدا وأنا بعمل الحاجة اللي بحبها ومع الوقت اشتغلت على نفسي وقدرت احقق نموذج من تحديد الشخصيات وبالفعل تابعت مواقع التواصل الاجتماعي لتنمية موهبتى وقدرت أنى أقدم نفسي للجميع .

وأضافت ” سلسبيل ” هي مكنتش موهبة علي اد ما كانت تعلم علمت نفسي بنفسي وانا في ١ اعدادي نزلت ابلكيشن رسم على موبيل وقعدت ارسم وقتها مكنتش اعرف نوع الرسم دة اية اصلا ولا اسمه هي جت بالصدفه ، استغليت وقتي اللي بمسكه للموبيل وبقيت ارسم في اي وقت واي مكان مش محتاجه بقى ادوات كتير اسكتش و اقلام والوان عشان ارسم هو بقى موبيل وبس .

واحده واحده ابتديت افهم اية الابلكيشن دة وبيعمل اية ويستخدم ازاي وبقيت انزل رسوماتي على الانستجرام وبس وكنت برسم رسومات كرتون بردو لحد ما اول مرة ارسم بورتريه رسمت أحمد حلمي و نزلتها و عادي هي هتجيب كام لايك ع كام كومنت وبس نمت صحيت لقيت احمد حلمي منزل الرسمه عنده مكنتش مصدقه وبقيت مبسوطه اوووي وابتدى ناس تدخل تتابعني و عدد فولورز عندي يزيد ، حسيت بحماس اوي وقتها ان لاء مش هوقف رسم وهكمل وهفضل انزل وابتديت ارسم ممثلين و مشاهير وانزل الرسمه و هما يشوفوها وينزلوها عندهم وكل مره كان حد مشهور بيرد عليا كانت بتديني دافع اني اكمل .

ابتديت اتعمق اكتر في الرسم الرقمي وافهم اية دة وطلع اسمه digital art باستخدام تاب او موبيل ع ابلكيشن في ممثلين نزلوا الرسمه و ممثلين ردوا عليا زي أ اسعاد يونس أ سوسن بدر احمد حلمي محمد رمضان احمد امين عمرو وهبه وغيرهم كنت بتبسط اوي .

وأضافت “وطبعًا البيت عندي كان يدعمني  وهما  اللي شجعوني على استكمال تلك الرحلة من خلال توفير كل الأدوات وفعلا حصلت على العديد من الجوائز وتم تكريمي وحصولى على مستوي المحافظة والجمهورية  .

وتابعت “ سلسبيل “كنت بقعد ارسم صحابي و ناس قريبي وانزلها ع الاكونت عندي لحد ما بنوته دخلت كلمتني طلبت رسمه لصاحبتها و بتقولي بكام قولتلها ببلاش قالتلي ازاي انتي رسمك حلو وكدة لازم تخدي مقابل وتعمليها شغل ، ابتدت الفكره تكبر في دماغي ولما دخلت اولى ثانوي و ابتديت اتعرف واحدة واحدة في مدرسة  وشاركت في مسابقات الرسم واخدت مركز اول على محافظة الجيزه و كنت اول واحدة تدخل الرسم الرقمي مدرسة منشأه البكاري ثانوي بنات .

وكان حلمي من صغري ادخل فنون جميلة وكنت بتخيل شكلي وانا رايحه جامعه وانا راجعه باسكتش والوان وانا بحضر محاضرات في فنون جميله ولكن في ٣ ثانوي مدخلتهاش بسبب مجموع مع اني دخلت امتحان قدرات فنون جميله وتربيه فنيه ونجحت فيه بس المجموع مساعدنيش اني ادخلهم .

ودخلت معهد عالي دراسات نوعيه قسم نظم المعلومات الاداريه وكنت زعلانه جدا لان دة مش حلمي ولا الحاجه اللي بحبها بس وقتها كانوا ناس بيقولولي ربنا شايلك الخير وقتها مكنتش فاهمه معنى الجمله وكنت زعلانه .

بالصدفه في ترم الاول من سنه اولى جامعه كان في مسابقة رسم لوزاره التعليم العالي ،اشتركت فيها ولما صدقت ان في حاجه في الجامعه ليها علاقه بالرسم وحصلت على المركز الثالثعلى مستوى الجمهورية و مستوى جامعات ومعاهد مصر في مسابقة بوستر ابداعي وابتديت اتعرف اكتر،وبعد فتره اخدت مركز ثالث جمهورياً من قصر الثقافه و الفنون في مسابقة ابداع .

ابتديت احب الجامعه واشتركت فى برنامج مشواري للتدريب وقتها قولت لنفسي هل هيجي يوم وابقى واقفه بتكلم زي دكتور اللي بتدينا تدريب دة  وقولت لية لاء  لية مبقاش زيها وابتديت ورا موضوع واعرف اية برنامج مشواري واكمل دكاتره عشان اوصل للبرنامج وبالفعل بعد سنه من مرور الوقت دخلت تدريب مشواري واخدت التدريب و بفضل ربنا بعد شغل و تدريبات و مذاكره بقيت مدرب مهارات حياتيه للنشئ معتمد دوليًا من وزارة الشباب والرياضة و منظمه الامم المتحدة اليونيسيف.

و في يوم  نزلت رسمه على الانستجرام  و صحيت على مكالمات من صحابي الحقي رسمتك تريند مكنتش مصدقه وقتها كنت اول مرة اعيش جو التريند وان رسمه في كل مكان وكله بيتكلم عنها و طلعت على التلفزيون في اكتر من برنامج ومن وقتها بقى عندي يقين ١٠٠٪ ان ربنا بيعملنا ديمًا الخير بس الاهم نحمده و نسعى ونجتهد وهنشوف تعبنا قدمنا وهو بيتحقق  وكل دة بقى مكنش شطاره مني دة كان توفيق من ربنا الحمدلله وكان بسبب دعاء بابا وماما ليا وبسبب تشجيعهم ليا.انا كمان خريجه الاكاديميه الوطنيه التابعه لرئاسة الجمهورية لبرنامج value .و رئيس لجنة ابداع وابتكار في اتحاد الشباب العربي وقدمت برنامج ” إيجاد فرصة بديلة للهجرة الغير شرعية ” أمام معالي وزير الشباب والرياضة د/ اشرف صبحي والسيد/ أيريك أوشلان مدير مكتب منظمه العمل الدولية و سيادة السفيرة / نائلة جبر رئيس لجنه الوطنية التنسيقية للهجرة الغير شرعية والأتجار بالبشر  و السيد اللواء / إسماعيل الفار رئيس قطاع الشباب بوزارة الشباب و الرياضة.